Mikill fjöldi nýtir gervigreindina og flestir sjá tækifæri í tækninni

Rúmlega fjórir af hverjum fimm stjórnendum íslenskra fjármálafyrirtækja telja að gervigreind muni hafa mikil áhrif á samkeppnisumhverfið næstu ár. Sambærilegur fjöldi sér fram á tækifæri vegna slíkrar þróunar. Lítill hluti stjórnenda, eða rúmlega 12% sér fram á að fækka störfum á næstu fimm árum, á meðan 44% sjá fram á fjölgun starfa á sama tímabili.

Þetta er meðal þess sem niðurstöður könnunar Gallup fyrir SA leiða í ljós, en þátttakendur voru stjórnendur íslenskra fjármálafyrirtækja.

Fjallað var um könnunina í Viðskiptablaðinu á dögunum. Í sömu umfjöllun var vísað til launakönnunar Samtaka starfsmanna fjármálafyrirtækja frá árinu 2025, þar sem kom í ljós að 55% þátttakenda teldu tækifæri fremur en ógn felast í notkun gervigreindar á sínum vinnustað. Þá töldu 74% starfsmanna að spunagreind myndi hafa frekar jákvæð eða mjög jákvæð áhrif á starf þeirra, til að mynda með tilliti til framleiðni og gæða.

Samkvæmt sömu könnun notuðu 14% spunagreind oft á dag til að leysa vinnutengd verkefni, en 18% daglega. Þá sögðust 23% nota spunagreind nokkrum sinnum í viku, en 26% nokkrum sinnum í mánuði eða sjaldnar, á meðan 19% sögðust aldrei nota slíka tækni við vinnutengd verkefni.

Sama könnun leiddi í ljós að 15,3% aðspurðra sögðust hafa fengið mjög mikla eða frekar mikla þjálfun í notkun spunagreindar, en 28,7% sögðust hafa fengið frekar litla eða mjög litla þjálfun. Þá sögðust 28,3% ekki hafa fengið neina þjálfun í notkun slíkrar tækni.

Störfin hafa þegar breyst

Heiðrún Jónsdóttir, framkvæmdastjóri SFF, ræddi þessi mál í Reykjavík síðdegis á Bylgjunni á dögunum. Þar sagðist hún telja áhrif gervigreindar vera ofmetin til skamms tíma, en vanmetin til lengri tíma.

„Það hafa orðið verulegar breytingar á störfum innan fjármálakerfisins síðustu ár. Starfsmönnum stóru bankanna hefur fækkað verulega, fyrst og fremst í þjónustu. Þannig hefur bæði starfsmönnum og útibúum fækkað mikið vegna sjálfvirkni- og tæknivæðingar. En það hefur fjölgað mikið í eftirlitseiningum annars vegar og jafnframt í hugbúnaðargerð og tækniþróun,“ sagði Heiðrún meðal annars.

Þá sagðist hún telja að gervigreind myndi líklega koma til með að breyta störfum er snúa að eftirlitseiningum, þar sem tæknin gæti í auknum mæli nýst til að greina tölur og reglur.

Viðtalið í heild má finna hér, en það hefst eftir rúmlega klukkustund og 48 mínútur af þættinum.

‍