Umsögn um frumvarp til laga um breytingu á lögum um hlutafélög og lögum um einkahlutafélög (EES-innleiðing)

Samtök atvinnulífsins, Samtök fyrirtækja í fjármálaþjónustu, Samtök verslunar- og þjónustu, Samtök fyrirtækja í sjávarútvegi, Samorka, Samtök iðnaðarins, Samtök ferðaþjónustunnar og Viðskiptaráð Íslands (hér eftir sameiginlega nefnd „samtökin“) sendu sameiginlega umsögn um frumvarp til breytinga á lögum um hluta- og einkahlutafélög til efnahags- og viðskiptanefndar Alþingis, en frumvarpið var lagt fram sem 604. mál á 157. löggjafarþingi, en náði ekki fram að ganga. Það var lagt fram að nýju, efnislega óbreytt, að undanskildu gildistökuákvæði 9. gr.

Samtökin vísa til sameiginlegra umsagna sem skilað var í Samráðsgátt stjórnvalda og til Alþingis, í tengslum við framlagningu frumvarpsins á 157. löggjafarþingi, en þann 1. október sl. skiluðu samtökin nýrri umsögn þar sem athugasemdir frá fyrri stigum voru ítrekaðar og fjallað almennt um þau sjónarmið sem samtökin telja að skuli ráða för við innleiðingu tilskipunar (ESB) 2017/828 (hér eftir nefnd „SRD II“ eða „tilskipunin“).

Samtökin minntu á að löggjöf um hluta- og einkahlutafélög væri grundvallarlöggjöf íslensks atvinnulífs enda væri þar mælt fyrir um umgjörð þeirra félagaforma sem langstærstur hluti íslenskra fyrirtækja byggði á. Vísað var til ábendingar úr minnisblaði ráðuneytisins þess efnis að SRD II væri lágmarkstilskipun sem veitti aðildarríkjunum víðtækt svigrúm við innleiðingu og mismunandi nýting aðildarríkja á því svigrúmi teldist ekki gullhúðun í eiginlegum skilningi. Samtökin bentu á að við innleiðingu ætti að nýta ívilandi heimildir og velja þá leið við útfærslu sem teldist síst íþyngjandi. Þessari meginreglu ætti að fylgja nema sýnt þætti fram á með rökstuddum hætti að ríkir almannahagsmunir krefðust annars. Í greinargerð með frumvarpinu er eingöngu greint frá því að ákvæðin samræmist tilskipuninni, en samtökin bentu á að skortur væri á heildstæðu yfirliti yfir þær valkvæðu heimildir sem tilskipunin veitti og umfjöllun um hvort og hvers vegna heimildirnar hefðu verið nýttar eða ekki.

Athugasemdir úr fyrri umsögnum voru ítrekaðar, en þær lutu t.a.m. að skilgreiningum hugtaka, orðalagi ákvæða og ákvæðum um auðkenningu hluthafa, mikilvæg viðskipti, þátttökustefnu.

Bent var á að skref hefði verið stigið í rétta átt með því að afnema fortakslaust bann við því að stjórnarmönnum verði veittir kaupréttir, en sjónarmiðum þó komið á framfæri varðandi útfærslu ákvæða er varða atkvæðagreiðslu hluthafafundar um starfskjarastefnu.

Umsögnina í heild sinni má nálgast hér.

‍